متنوعة

كل إنسان له جانب ضعيف خفي وعنده عيوب مهما ظهر قصاد الناس أنه كويس وأقرب للمثالية، لأن مفيش حد بيصور خيبته زي ما بيقولوا ولا حد هيمشي يتكلم عن عيوبه، كمان مفيش حد له الحق أنه يطلع على الجانب الضعيف ده، ولكن لما بتقرب منه بزيادة بتقدر تشوف كل ده ضعفه وخوفه وأي ألم مدفون جواه وبيحاول يداريه بأي شكل .. عشان كده مينفعش تبني صورة مثالية عن أي شخص وبعدين تتصدم لما تكتشف عيوبه ، أنت مش مجبر إنك تستحمل العيوب دي مش مجبر تستحمل مخاوف اتزرعت جواه من ماضي بيحاول يهرب منه طول الوقت، وأظن الفرق واضح جدا بين النفاق وبين العيوب اللي مفيش إنسان خالي منها، فماترفعش سقف توقعاتك عن شخص لأنه في لحظة السقف ده هيتهد ويا إما تتقبل العيوب دي من غير ما تقعد تفكره كل شوية بيها وإنك بتعمل مجهود فظيع عشان تستحملها يا إما تتركه في صمت وتسيبه في حاله لأن كل إنسان في حرب وجهاد مع نفسه وماضيه ومخاوفه لا يعلم بها أحد والله.