إسلامية

‎ يوم واحد فقط يفصلنا عن شهر رجب..شهر البذر! كل عبادة نفسنا تكون ثابتة معنا في رمضان لو مروضناش نفسنا عليها دلوقت مش هنثبت عليها! رمضان مش عصاية سحرية :) 1-وما أنصح نفسي وإياكم به أن تسمعوا كثيرّا عن التوبة.. ولازم يكون عندنا نية صادقة للتغيير والعمل..مش مجرد سماع! نتوب توبة صادقة بجد علشان نعرف نبدأ.. ونسمع محاضرات كتير لمعالجة وترقيق القلب..ودي خطوة مهمة جدًا) عندنا الشيخ محمد خيري، الشيخ سمير مصطفى، وغيرهم الكثير بفضل الله عز وجل. ثم ماذا؟! 2-الكثير من الدعاء والمناجاة لله عز وجل.. لأنك لو وُكِّلت لنفسك ستهلك! مهم جدًا نتضرع لله عز وجل بالدعاء.. أن يصلح قلوبنا، عبادتنا، وأن يجعل هذا الشهر أفضل ما يمر علينا.. مهم ندعي بالتوفيق والقبول دايمًا! ندعي في كل همسة وخطوة، كبيرة وصغيرة، والأهم نتحرى أوقات الإجابة وندعي فيها. 3-ومن ثمَّ نضع العبادات التي نريدها معنا ونريد الثبات عليها في الشهر المبارك، بل والإحسان في العبادات التي نفعلها بفضل الله عز وجل. تطبيقات عملية(أمثلة): مبدأيًا هنكتب اللي محتاجينه سواء في ورقة أو برنامج على التليفون نتابع من خلاله..كله خير بفضل الله، وناخد الطريق بالتدريج؛ لأن مفيش حد طبيعي بيبدأ أول سلمة في مشواره بـ 100 ركعة قيام أو 10 أجزاء قرءان في يومه مثلاً! خدوا الطريق واحدة واحدة.. 1-الصلاوات الخمس والخشوع فيها، إذا صَلحت صَلح سائر العمل بإذن الله عزوجل. 2-ترويض النفس على النوافل من الصيام وصلاة الضحى وقيام الليل. 3-ترويض النفس على السنن الرواتب(ال 12 ركعة في اليوم). 4-‏ترويض النفس على ورد القرءان اليومي مهما كان قدره، وسماع أي محاضرات لها علاقة بالقرءان وفضله والعيش معه والارتباط به :) التدبر..ممكن تبدأوا بقصار السور مش شرط نتدبر كل القرءان لأن دا بياخد شهور وسنين..لكن المهم بل الأهم نبدأ رحلة التدبر ونتذوق حلاوتها..وأوعدكم بعد كدا هيبقى ورد بالنسبة لكم وعِشرة عمر كدا :) (كتاب المختصر سهل ويسير+اسمعوا لأي حد ثقة بيتدبر القرءان مثلاً د.أحمد عبد المنعم). 5-‏بر الوالدين وتحسين العلاقة معهما، وكذلك صلة الرحم. 6-‏إصلاح أي فساد في العلاقات بينَّا وبين أخواتنا في الله والإحسان في التعامل معهم، وقبل العلاقات دي ركز على إصلاح علاقتك مع نفسك والرفق بها :) 7-النوم بقدر الحاجة..يعني نقلل ساعات نومنا، سننام كثيرًا في القبر والله.. الله يحسن ختامنا ويصلح حالي وحالكم اللهم آمين (مش لازم 6 أو 7 ساعات..كل شخص بيختلف عن التاني..ممكن تقسم ساعات نومك بالليل والنهار؛ يعني مثلاً لو شخص يكفيه 9 ساعات نوم وقسمهم شوية بالليل والباقي بالنهار كويس) هونوا على نفسكم وكفاية جلد ذات.. مفيش حاجة اسمها عايز أنام 4 ساعات! ما يمكن جسدك محتاج أكتر! مش مهم بتنام قد ايه المهم لما بتصحى بتعمل ايه؟! (لكن نجاهد ونشوف الكفاية لنا؛ لأن النوم دا شهوة زي أي شهوة لكنها مُباحة، الفكرة بس نحاول نقلل بلاش ال 12 ساعة وال 13 واللي بيحصل دا) 8-عوِّدوا نفسكم على الصدقة مش شرط يوميًا ولكن تكون موجودة. 9-عوِّدوا نفسكم على أذكار الصباح والمساء والنوم، والأذكار الأخرى زي الخروج من المنزل ودخول الخلاء وهكذا.. عوِّدوا نفسكم يكون لكم نصيب أو وِرد من: (الذكر-الاستغفار-الحوقلة-الصلاة على النبي-وهكذا..) (اسمعوا واقرأوا عن فضل الأذكار دي وأهميتها). 10-أي برامج علمية وشرعية مشتركين فيها اثبتوا وكملوا فيها، وخصصوا ليها وقت في يومكم..وبلاش تراكمات :) الحاجات دي تعتبر تزكية للقلوب وبتاخدنا من الفراغ؛ لأن الفراغ سبب كبير للوقوع في المعاصي والذنوب عافانا الله وإياكم. 11-اجعلوا لنفسكم نصيب من القراءة في السيرة النبوية وسير الصحابة رضي الله عنهم، وازاي كانوا بيستعدوا لرمضان..كل دا هيديكم دفعة قوية بإذن الله. 12-الناس اللي بتدرس نظموا وقتكم شوية هتقدروا توفقوا بين الدراسة والاستعداد إن شاء الله تعالىٰ، مفيش حاجة اسمها الدراسة واخدة وقتي دي خدعة من خدع الشيطان؛ علشان يشغلك وتيجي في رمضان لا حول لك ولا قوة! ويضيع زي كل سنة.. وافتكروا.. لو رأى الله عز وجل منك صدقًا أعانك. 13-ابعدوا عن السوشيال ميديا وقللوا منها لأنها أكبر عدو لكم ولوقتكم..سواء فيس بوك، واتساب، تليجرام، تويتر، يوتيوب، أي حاجة! (مش هيفوتكم حاجة لو قفلتوا لا تقلقوا..الفضول اللي بيكون عندنا دا ومخلينا فاتحين ليل نهار هيودينا في داهية😁) الله يصلح حالنا جميعًا.. وخلينا عارفين :) العبرة مش في كثرة القراءة في الكتب وسماع المحاضرات؛ يعني لو سمعت سلسة واحدة أو قرأت كتاب واحد وكانت/كان سبب في العمل لكفىٰ! مش هنتحاسب مين سمع أكتر من مين! العِبرة في عملك يا مسكين. مش عايزين نعمل العبادة يوم ويوم لا! دا ممكن يحصل معنا حاليًا في فترة الاستعداد؛ لكن في رمضان عايزين نثبت طول الشهر بإذن الله. ودا مش بيجي بسهولة^^ الله يفتح لي ولكم في كل خير اللهم آمين. ‎