قصص وعبر

أنا عيطت لما سمعت القصة دي من صاحبتها. بتحكي بتقول ، كنت بحب صاحب أخويا جدًا وهو كان جارنا ودايمًا بيجي عـندنا وبينا عـيش ومـلح ، كـنت بحاول بـقدر الأمكان أظهر قدامه عشان يلاحظني في الوقت ده اتقدملي زميلي في الجامعة ورفضته لإني بحب جارنا وفعلاً بعد محاولات مني خـطبني وده بعد مـا دعيت ربنا كتير جـدًا عـشان يكتبهولي وبعد الخطوبة بشهرين اكتشفت إني عندي كانسر في الرئة آخر حاجة اتوقعتها إنه يسيبني بس للأسف ده اللي حصل رن عليا وقالي كدا بالحرف الواحد أنا سألت دكاترة وقالوا إن الكيماوي بيعمل عقم وأنا من حقي أبقى أب عمومًا رحم الله امرؤ علم قدر نفسه وانا مش هقدر أكمل معاكي وسابني رغم إنه عارف إن عشان الرئة تستجيب للعلاج لازم المناعة تكون كويسة وأهم عامل لقوة المناعة هي النفسية. ادمرت بالمعنى الحرفي وروحت أخد أول جرعة كيماوي في الفترة دي قربت من ربنا جدًا وحقيقي مكنتش ببطل دعاء وكنت دايمًا في دعائي أقول لا إله إلا أنت سبحانك إني كنت من الظالمين كـنت بدعي ربنا يشفيني عشان بابا لإني كنت لما بخرج مـن الجلسة كنت بلاقيه نايم على الأرض مستنيني وهو بيعيط وكمان لإن مرضي نادر. ساعتها عرفت إن زميلي اللي اتقدملي ورفضته كان متابع أخباري من بعيد ولما سمع عن مرضي لاقيته واقف في المستشفى ووقف جنبي وهو بيعيط وبيدعي ربنا يشفيني عشان نكمل سوا. والله العظيم بعد أربع جلسات بالظبط الدكتور طلب مني أعمل أشعة عشان لو المرض مش بيخف يغير بروتوكول العلاج والمفاجئة إن لما روحت عملت الأشعة ملقتش آثار للمرض أصلاً ، مش عاوزة أوصفلك فرحتنا وفرحة بابا كنا مش مصدقين عظمة ربنا وعوضه. والمفاجئة الأكبر إننا لما إتجوزنا حملت بعد شهرين جواز وأجهضت وحملت تاني. ساعتها عرفت إن الشخص ساعات بيدعي بحاجات فيها هلاكه وإن في ناس تستاهل وناس متستاهلش ، في ناس بيحبونا في اسوأ حالاتنا وناس عاوزانا دايمًا منورين ولو تعبنا أو انطفينا يبعدوا. صدقوني تراتيب ربنا جميلة وعظيمة والدعاء فعلاً بيصنع معجزات ولسه والله ياجماعة في ناس ولاد أصول وبيعرفوا يحبوا بجد. ♥ - حدثت بالفعل