قصص وعبر

#أمي علمتني من وأنا صغيرة إني ما روح عند صديقتي إللي عندها إخوان شباب وهمه موجودين بالبيت ، وإذا زرتها زيارتي ما تتجاوز الساعة .. ولما زور حدا كون خفيفة نظيفة وما تقّل ع أصحاب البيت مهما كانت علاقتي فيهم قوية .. كانت تحكيلي عدلي قعدتك ، وشدي حنكك لما بتحكي مع الغريب ، واحترمي يلي بيحترمك وشيليه ع راسك ويلي بيقدرك ضويله أصابعك شموع .. علمتني لما حدا يقعد معها ما أتدخل بالكلام ، ولو سمعت حدا بيشكيلها أنسى شو سمعت وأدفن الحكي يلي سمعته بأرضه .. ولما أدخل بيت قدروني أصحابه وأمنوني على أسراره ، ما أطلع أحكي شو شفت عندهم وألجم لساني عن ذمهم وغيبتهم .. علمتني شو يعني شبع ، وغرقتني بفضلها وقالتلي لما تشوفي حدا عنده الشي يلي ما بتملكيه ما تقولي شمعنا أنا !! هو عنده وأنا لأ ، قولي الحمدلله والله يتم عليهم . أمي مدرسة فاقت مدارس العالم بالفهم والإدراك أهلتني أني كون أميرة متلها وست بيت واعية ، و إنسانة مثقفة وفهمانة وملمة بأمور الحياة وعارفة شو يعني أصول،، لأنه هالكلمة وزنها أغلى من الذهب في قلوب الناس يلي تربت عليها 🌸✨